الاوله لا عيب | حامد عامر

يالي انتي توبه ومغفره
علي قبلتك وليت
انا حامي عرضك فالدرا جيت فالعلن وطيت
شاخت تقاوي البلد نبت العيال فالهيش
واخترت اموت بالنعم
جايز في (لا) هتعيش
قالت ياواد الشرف..انا قلت هااا ..بيعيه
قالت كتير الدم
روحي بلي ريقهم بيه
ملعون ابوه الخوف خلا الزنا معمعه
ويامين يقيم الحد طبع الوطن إمعه
واللحم عرض وطلب والعار يطول الكل
يافرحانين بالذل والقعده فالحانه
شيخ البارات افتي يا اسكر/ياكفرني
عبيلي كاس براند واتوصي يا يني

ياريتني كنت غريب زييكوا ياخواجه
ولا كنت اجيك واسكر
ولا اتشتم بامي واطلب لدمي قصاص
القي الميزان منصوب علي سونكي وبياده
يابختكم مافيكمش حد اتدفن فارضه
ولا صلي ركعة قهر فجوامع العسكر
قال كلنا اغراب
انا بلدي ناسياني وانت كمان كرهاك
انا بره وطني صحيح وانت الوطن برا ك
حاجه قصاد حاجه
ضحك وصب الكاس..بكيت وبصيتله

حتي انت ياخواجه...