الدُّنيا حكايَة
لمَّا يقابلَك صاحبَك قُلُّه
بُص يا صاحبِى بَلاش تِتحيَّر
لو لفِّيت العالَم كُلُّه
تلقَى ضَمير النَّاس مِتغَيَّر
الأيَّام مَبتِتغَيَّرشى
هِيَّا النَّاس اللى يتِتغَيَّر
وهاقولهالَك قَبل مَتِمشى
بُص يا صاحبِى بَلاش تِتحيَّر
الشَّر مَع الخير بِتصارِع
والدنيا بَقِت لِيهُم حَلَبَة
لمَّا تشوف النَّاس فى الشَّارع
تِلقَاهُم ماشيين بِالقَلَبِة
وكأنِّنا نازلين السُّوق
ناس للفُرجَة وناس للبيع
والحالَة ما بينهُم بِتسُوء
وكلام بيفتَّح مَوَاضِيع
ناس بِتبيع لو حتَّى أبُوها
بأى فلوس بس تكون كاش
أنا مَعرَفش ازَّاى حَسَبُوها
لَكِنِ ازَّاى يتباعوا بلاش
دَاللى يبيع أصلُه يَـ وِلدَاه
بُكرة يضيع علشانُه أنَانِى
اتغَر فـ قِرشين ويَّاه
صِحَّة وعِزوَة ، وكُل دَ فانِى
ولا دايم غِير المَعرُوف
اللى يقدِّم شئ يلاقِيه
عِيش سُلطان أو عِيش حَلُّوف
زَرعَك بس انتَ هَتجنِيه
مَيغُرَكش المال والكُترَة
عَملَك هواللى هَيبقالَك
وان كُنت صَحيح شايف بُكرة
فى الخِير دَيماً اصرِف مالَك
وابعِد مال النَّاس عَن يَدَّك
وخصوصا لو حَق يتيم
وارضى برِزق حَلال مِن كَدَّك
دَ مَفِيش أبرَك مِـ الملاليم
ناس بتطاطِى عَشان اللقمَة
وان كُنت فَقير تِهرَب مِنَّك
أصل الفَقر دَ أصبح تُهمَة
بتخَلِّى النَّاس تبعِد عَنَّك
يمكِن فيه كام واحِد طَيِّب
أمَّا البَاقى يا صاحبى تَعالِب
وعَشانَك حِلو بِتِتعَيب
ويشاوروا يقولوا عليك خايب
دِِى الدُّنيادِى دُنيا أَوَنطَة
فيها الطَّالِح وفيها الصَّالِح
حَتَّى الحُبّ صَبَح بِالواسطََة
عاملُولُه مَحلات ومَصالِح
ناس تِدَّارَى فِـ وِش مَلاك
أمَّا القَلب دَ قَلب شِيطان
لو تِعامِلهُم تِلقَى معاك
واحِد تانى مَهُوش إنسان
ناس على خَلق الله بتدُوس
مِن غِير رَحمَة تقولش وُحُوش
قِلة ذِمَّة وكُتر فلُوس
وضَمير خَربان قَوى مَغشُوش
فين الرَّحمَة ياناس فـ قلُوبكُم
فين العَدل ياناس فـ حَياتكُم
لمَّا بِعَطف تِرَبُّوا كِلابكُم
والمساكين بَرَّا اهتِمامَتكُم
ناس نايمَة ومَنظَرها يُغُم
فُوق الاسفت وتَحت الكُوبرِى
مِن غِير أَب ومِن غِير أُم
ومِن بَدرِى عَـ الرِّزق بتجرِى
وناس تانية عايشين فـ قصور
مَبنية مِنِ الدَّهب الخالِص
عَطاياهُم مَظهَرَة ودِيكُور
مش حاسِّين بالفُقَرا خالِص
ناس مِرتاحَة وناس شَقيانَة
سُنِّة رَبِّنا فى المَلَكُوت
ناس هَفتانَة وناس شَبعانَة
ناس مِن غِيظها تِطَق تِمُوت
وناس واخدِينها لبان وتَحالِى
ومَحَدِّش بيقول انا مالِى
سِيرتِ النَّاس فى لسانهُم لِعبَة
عَـ القهوة عاملِينها تَسالى
ناس شَغَّالَة وناس بَطَّالَة
لِسَّه بِصِحِّتُه بَس عَوِيل
بيقَضِّيها بَلطَجَة وقِوالَة
وليالى حَمرا طُول الليل
ناس أيَّامها حَرام فـ حَرام
عايشَة حَياتها تقُول أَهِى عِيشة
عُمرهَا ضايع فى الأوهام
طاولَة وضُمَنَة وخَمرَة وشِيشَة
دُنيا غَرُورَة يا ناس خَدَّاعَة
تُصدُق مَرَّة وتِكدِب مَرَّة
عَلَشان نِشتِرِى مِنها بضاعَة
مالهاش سِعر لا هِنا ولا بَرَّه
واحنا عَشانها بِنخدَع رُوحنا
ونصَدَّق كِدبَها ونكَمِّل
ولا يوم أبَداً فيها ارتَحنا
وياريتنا نعِيشها من الأوِل
عَند العَهد يا صاحبى وحَاسِب
خَلِّيك رَاجل واحفَظ عَهدَك
وان كُنت بتِحسِبها مَكاسِب
اكسَب نَفسَك واعرَف حَدَّك
ناس غَدَّارة ومالهاش صاحِب
لا بتُصدُق فِـ وُعُود ولا تِوفِى
ولا تِتآمِن ولا تِتصاحِب
ولا تاكُل غِير لَحم مِشَفِّى
اوعَى تُبص لِلَحمِة غِيرَك
عَندَك لَحمَة حلال تِكفِيك
لا النَّار تِبقَى يا حِلو مَصِيرَك
وساعِتها رَاح يشمَتُوا فِيك
افتَح قََلبَك واعبُد رَبَّك
سِيبك مِـ اللى يقُولُو شِيطانَك
وافتِكِر انُّه فـ يوم هَيحاسبَك
وبعمَلك هترُوح لمَكانَك
واهِى دِى الدُّنيا ودِى آخرتها
امَّا الجَنَّة وامَّا النَّار
ودِى يا صاحبِى كانت حِكايتها
ولا تِتلَخبَط ولا تِحتار
الأيَّام مَبتِتغَيَّرشى
هِيَّا النَّاس اللى يتِتغَيَّر
وهاقولهالَك قَبل مَتِمشى
بُص يا صاحبِى بَلاش تِتحيَّر
*******
