بيفكر يرسم دواير مليانه نقط سوده
أو يكتب قصيده خاليه م الصور
ويسميها كوابيس قديمه
وقبل مايسلم دماغه للمخده
يحل نفسه من كل الوعود
عينيه هاتنعكش القمصان الداكرون،
والبيجامات المقلمه ،والكتب الصفره
تفرد له مساحه معقوله م الجنون
يادوب تسمح له بكنس الشوارع م الضحك
ويشوف الكراكيب اللي ماليه الزوايا
فى هيئة حبيبه
بتنزل عليه وهى مطبقه جناحاتها
مش هايعمل عاقل
هايفضل يعطل البصات اللي بتسربها
م السما
ع الرصيف
على باب أوضته
لحد مايهرب لحد من صحابه القليلين
اللي مافكرشي فى عددهم قبل النهارده
أو يمشي فى الشارع وشه للأرض
وشفايفه بترمي آخر ضحكه على بوز جزمته
ساعتها هايعرف
إن الملايكه مابقتش ساكناه
وانه مش لازم يبتسم لأى حاجه
م اللي كان بيحبها .
