سعادة الشعر
حمدي موسي
باحب الفكرة تتحور وتتدور وتلبس كعبها العالى
ويخرطها بتاع الشعر ينقشها على بالى
ازوقها لكل كتاب
واراودها فاتنزع عنها كل حجاب
واشوف غيرها فى سوق الحب والحكايات
وينقال الجدع ماشى ورا الكلمات
واضيع كل راسمالى
فاترمينى بطول إيدها أعيش شحات
أقف على باب مساجدها
ابوس إيدها
وأقف على باب كنايسها
أونسها
واقف على باب مدارسها
أعاكسها
وأمد إيديا طوالى اقول لله
مايصعبشى عليك غالى
عشان النيه ألمسها
واخش حياة
تلاقى روحها مكتوبة
باحب الكلمة لهلوبة ومرغوبة
أحايلها عشان اكتبها تخدعنى
وتطلع منى مشطوبه فاتوجعنى
تجننى وتنخلنى وتعجننى..تشكلنى
وتعمل منى كعك العيد
وتلبسنى قديم وجديد
وتدينى عيديتها وتقتلنى وتطلب منى ديتها
تخلينى حزين وسعيد
تشعوطنى
واقضى الليل لانا نايم ولا صاحى
وإيدى تدوخ ما بين راسى وبين بطنى
واقول الاأأأأأأأه من المعنى
ويجى الشعر يسمعنا ويلطعنا
على بابه مايفتحهوش
سعادة الشعر ياباشا
مخلينى هواك ملطوش
انا طمعان أنول البدلة والطربوش
ونفسى ابووووش فى إيد كرمك
وتفتحلى بيبان حرمك ف كل صباح
انا برتاح وانا باجرى وراك انهج
وباتنشئ على حبة عفار منك يردوا الروح
عشان اثبت على منهج
انا العايش بلا دولة بلا قوة ولا حول
بقول الشعر للمولى
وهوه سامعنى من فوق السبع سماوات
كما خولة ......وقد سمع
حوار الشعر ويايا
وانا لولا رايت برهان لهميت به
ولولا السنه والقرآن لصليت به
ومستنى رسول الشعر ينزل لى وانا أولى
دانا لولا عيون الكلمة كنت أموووووت
باحبك وانتى فارضه شرووووووط
وانا موافق
إوعى تجينى بالراحة لاشوف غيرك
دا انا مخاوى وانا مرافق
احبك وانتى عنادية مرازيه
واحبك وانتى عفريته وجنيه
تخايلنى بنظرة عين......
تعذبنى ملاغيه
تبخرنى وتنهرنى وتعذرنى وتسكرنى
بحبة شوووووق
ولما أدوق حلاوتها فايطلع جدرها من فوق
فاتبعت شمستى ميه
ماهو الحب اللى بالساهل
يادوبك ليل وصبحية
لكن طول ما الأمل موصول
انا باكتب بحنية
ولما البال يكون مشغول
بيتدارى الوجع فيا
واعيش ليكى قصيدة تكتبينى انتى
بقلم الروج على النية
وتبقى الفكرة فى الآخر قصيدة شعر مرمية
ولاحدش عمل بيها ولا حد التفت ليها
فاموت فيها
لغاية لما فكرة تفوت
وتنفخ تانى روح فيا
تسهرنى......وتسهرنى
وتاخد من دفا قلبى وتصهرنى
ولما تشوفنى ناوى اروح ....تصبرنى
تفك زراير المعنى
ويجمعنا فى ليلة شعر أغنية
