الطريق الدائرى
حمدى موسى
الشمس نسيت نفسها...خرجت وفاردة شعرها
يظهر شيطانها وزها
قلعت فى أحضان القمر كل الهدوم
فاتأخرت على شغلها
طلعت علينا وشكلها من غير حموم
وعشان كده شكل النهار جه مختلف عن كل يوم
وقف الطريق الدائرى
مقطورة ركبت ميكروباص
ولأننا لنا طبع خاص..الكل هاص
ومادمنا مش قادرين نلوم الدائرى
والمشكلة فى السامرى
فلا مساس
مش عاوز اموت بالشكل ده... ولا بالرصاص
أنا عاوز اموت بعد الصلا وعلى الوضوء
حبة هوا مش عاوز اموت مخنوق
أنا نفسى اموت فى هدوووء
والدم كله ف جتتى
من حقى اموت بعداللى شوفته ف عشقها
على فرشتى
هوه انتى شوفتى فى المنام ان انتى لازم تدبحى؟
طول عمرى كله يابلد م الصابرين
ولا عمرى مره قلت لك طب حطى نفسك مطرحى
رؤياكى باطلة يابلدنا.... وانتى مش م المرسلين
وعشان بحبك وانتى عارفه....ياحبيبتى إفعلى ما تؤمرين
لوكان فى دمى زمزمك ...يالا ادبحينى مرتين
على شرط يجى العيد عفى
تخرج ولادنا فرحانين
والشمس تطلع فى الحلال
انا حتى مش طالب قمر
ناولينى لو حتة هلال
ومش عشانى صدقينى كله علشان العيال
انا نفسى ابوسك يابلدنا بس مش شايف خدود
لو كان عليا بذنب واحد
قيمى على قلبى الغبى كل الحدود
بس العيال !!
عاوزة الصراحة ولا عاوزانى اخدعك شاشة ومقال
انا الحقيقة المطلقة... يابطن قلابة بصحيح
أنا الحوارى الضيقة والضلمة والعشش الصفيح
انا القبيح اللى ابويا يوم حلم فاكدب و سمانى جمال
انا اللى ماسك طرف ديلك بس مش طايل وصال
اخين وتوأم أم واحدة واب واحد والرحم مفيهوش فصال
ازاى يكون الأولانى فى اليمين والتانى يبقا فى الشمال
رايح وجاى
والمعضلة................. إن الطريق الدائرى
معظم كباينه معطلة
ومفيش وسائل اتصال
