الرئيسية » » كوابيس العالم | حمدي حسين

كوابيس العالم | حمدي حسين

Written By Unknown on الأحد، 12 يوليو 2015 | 3:33 ص

كوابيس العالم
ياليل.. والبحر بالليل غير البحر فى الناير
والثوره فى يونيو غير الثوره فى يناير
عارفه ..نفسي أفاجئ كل اصحابى ..برؤية جديدة .
زاوية جديدة
بقالي سنين مش فاهم حاجه .
ما كتبتش حاجه .
ولا محتاجه الدنيا قصايد تانى
شهيده
الفكره/ النكرّه
اللى انا مش عارف أرسى عليها /البر
اللى انا مش عاوزاشوفو..
السرك المنصوب ف الميادين اللى بارجّع منه واعوفو
الكر/الفر,كوابيس العالم
والنكته البايخه فى اختيارات االمُستفتى المُطّر..
طوابير الخيبه
ف مشهد ههزلّى ..عبثى ..عبسى ..
بريحة الخوف وبطعم الخل
ناس بتموت علشان تسلم
وناس بتموت علشان تتشل
شهداء بنشيع جنازاتهم على نغم التكتك
وزعيق الحزب الحاكم ونعيق الحزب المنحل ..
عيشه تعلّ ..
هل ؟
مصارينكم طلعت
كلها القرش
ف بحر الثورات الهادر
ونصبتو الشادر
هل ؟
عطرتو السجاجيد بالبانجو وقرشتو الافيون قرش
ولا قريتو القرآن كله
ف سرداب سرى علشان الامن ما يعرفش
ولا دماغكم ولعت هرش..زى حالاتى
ولا النوم اتهد عليكم بعد ماردم الفرش..
وهل
.. بلّ الموج الهايج فيكم نار الشوق وطش..
قلبكو هش وبش..
ولو.. لدقايق ..
يا شقايق.يا حقيقة عمرى المش طايق
والمتضايق جدا جدا من عمايلكم
حاجه تفطّس ..
شعب غريب ..
حتى فى عز الازمه يهجس
لأ والأنقح
" شيخ الدعوه"
جزمه بتقلع قدم الشيخ
تملى عيون
الشيخ التانى..
علشان لو خالف شيخ الدعوه شيخ الدعوه التانى
يديه بالجزمه ..شوفتوا الازمه
حاجه تغطس راسك منها فى لوح التلج الناشف..
مشهد كاشف للى بيحصل جوه نافوخى .
مشهد فاضح ..واسخن من افلام البورنو ..
ولا رغيف العيش الكاره فُرنو..
اسخن من مواتير الفتنه الفايره..
اسخن م البت البايره ..
أسخن من كل الاسئلة الحايره ف راسكم
ونفسها تهدا وترسي
مش على كرسي ..
نفسها تنزل مع شقشقة الفجر
وترجع بعد العصر..
بعد ما تعصر قلبها عصر ..
مش راح أغنى عليكم
مش رح اقولك علشان مصر..
علشان بس تريح بالك..
زى عيال الشارع
اللى هرونا من شقاوتهم طول اليوم الفارع ..
وانت تعيشلك ساعه ف طاعه
وساعه صياعه
من غير فيجا
وتت وبت ولعب وسيجا.
بس ازاى...؟ ,حاجه جميله ومبهجه جدا
جدا جدا
بس ازاى..؟ حد يقولى ؟؟
تعزل نفسك بره العيشه وتعمل عيشه
مابلاش عيشه
تعزل نفسك بره الدنيا وتعمل سونيا
وتربط راسك بأقدم خرقه من الساكسونيا
ولا تعوم ع الموجه التانيه وتعلى وترمى دماغك
ولا تسيب اولادك تشحت
وانت معسكر بره يا عم
لجل ما تشهد آخر موجه فى ثورة بكره الفكره /النكرّه /الذكرى الباقيه فوق اسفلت الدم
عفريت الهم الطالع فوق الخيمه/ الغيمه المانعه النور ينزل للشارع
والشارع مر ..
كله محبس جوه الفكره وعامل حر
وزبالة شوارعنا كتيره مش محتاجه فتّيلة
يا خميرة عكننه يا قبيلة كره وغلّ
ياكاوتشات الرحله الوالعه فى ثورجى ثاير لسه ما ملّ
كفايه عنينا اكلها السل
ومش بتفرق بين الناصر والمحتل
كفايه حرام الشعب اتزل



التعليقات
0 التعليقات

0 التعليقات:

إرسال تعليق

يتم التشغيل بواسطة Blogger.