ايدى مش فاهمة حاجة | حسن خلف

الحقينى لو تقدرى
انزعى من عروقى
عتمة حيطان الحبس
السجن يا حبيبتى
جبيرة جبس
وجرح نافد ع الروح
بينزف الم
رجعيلى تانى صوتى
انا صوتى دايما من دراعى
بس النهاردة غصب عنى
صوتى الجرىء انكتم
علمينى صنعة مش محتاجة لايدين
علمينى من تانى الكتابة
انا ابجديتى مش حروف
مرصوصة على غلاف كراسات الولاد
انا ابجديتى فعل فاضح
فعل كاقر بالمهادنة
ورافض زيف البلاد

الحقينى لو تقدرى
رجعى لصوابعى
احساسها بنبض قلبك
وانتى فى حضن الدراع الجبس
رجعيلها تانى الشوف
الشوف يا حبيبتى مش نظر
الشوف يعنى مفهوم العلاقة
بين حواسى والحاجات
انا عمر ايدى ما كانت واخدة ع السكات
بس النهاردة غصب عنى
ايدى مش فاهمة حاجة
ايدى فى حالة شتات
ايدى فى حالة شتات ...!!!