الرئيسية » » الشعر جرح | حسام حسين

الشعر جرح | حسام حسين

Written By Unknown on الأربعاء، 20 مايو 2015 | 6:21 م

الشعر جرح
محال هدوم الدنيا تقدر..
تستره
وجع السنين
حصيلة الفرجة على الناس 
والحياه
حلم الخلاص
تدمير جبل
بارك على كتاف الحزين
مانعه الصريخ والشكوى
من ظلم البشر

الشعر رزق الطيبين
لو قاموا يوم بدري
محتاج سلامة ..
نية المجنون
وبراءة الطفل اللي لسه
مالوثوش يومه
الشعر بلكونة ف شتا
لا بتمنع الروح م البلل
ولا ليها طاقة ..
تصد ريح
غير لما شيش الفطرة
ينسى ويتقفل
الشعر زي الدنيا
مش عاوزة اللي عايز
تفضل تطارد فيه..
يذلك
يمسخك
تنساه ..
يجيلك
بنت فوق حد الخيال
تنساه زيادة..
يكلمك
تعرض عليك
كل التجلي ف سحرها
ف قصيدة تشبه
ومضة الغيب البعيد
حقيقة مكنونة ف كتاب
زال سترها
طاقة قدر
دفعاك تقوم
تمسك قلم
تكتب ف حين
هي اللي قامت .. تكتبك
الشعر ضد
هو اللي بيخلي البكا
أجمل من الضحكة
هو اللي بيعري الطغاة
قدام ذواتها
بيفلسف المأساة وينتج
م الوجع حكمة
لكنه؛ للأسف الشديد
ماقدرش يوصف حب
وخصوصا كبير
قد اما كان بارع قوي
ف وصف الفراق
الشعر كاهن
طلَّق الدنيا وقعد
على طرف أيام البشر
يسمع ذنوبنا بتعترف
وما بين ..
قصيدة واختها
بنعيش ف طُُهر الاعتراف
بذنوب قصايدنا الجديدة
وكأننا
آخر عصاة .. حكم الإله
مالهومش توبة

التعليقات
0 التعليقات

0 التعليقات:

إرسال تعليق

يتم التشغيل بواسطة Blogger.