ياريت لو كنتِ تستَنِّى
حمادة البهلوان
*******************
فِـ ضِلِّك عِشت أحلَى سنين
وبُعدِك خَلَّى قلبِى حَزين
غَريبَة الدُّنيا مِن غِيرِك
ومِن غِيرِك هاعيشها لمين
***
تنادِى الروح عَلى مَهلِك
يا فايتة الذكرى بين أهلِك
وتطَّلَع عَلى صورتِك
وبدموعها بتندهلِك
***
كمان العين مابتنمشى
ومِن دَمعى انجرَح رِمشى
ياريت لو كنتِ تستَنِّى
أضُمِّك قَبل ماتمشى
***
عَشان لو تُهت فِـ بلادِك
وحَنّ القلب لِودادِك
يكون ويَّايا شئ مِنِّك
يصّبَّرنى على بعادِك
***
وَحِشنِى الضَّى فـ غيابِك
ودَقِّة إيدِى فُوق بَابِك
بعادِك عَنِّى دَ مَنَابِى
وجَنِّة رَبِّنَا مَنَابِك
***
وَحِشنِى حُضنِك الدَّافى
ونَبع حَنانِك الصَّافى
وزىّ ماكنتِ مَركبتِى
كمان كُنتِ انتِ مِجدافى
***
تِسَع تُشهُر وانا جُوَّاك
ضعيفَة وربِّنا قَوَّاك
وشيلتى هَمِّى مِن يومها
فيبقَى ازَّاى اخيب وانساك
***
أنا فاكِر ومش ناسِى
لاانا جاحِد ولا قاسِى
ويشهَد ربِّى يا امَّايَا
جِميلِك شايلُه فُوق راسِى
***
وبِرِّك طُول مَانَا موجُود
دَ دِين فِـ رقبتى فَضل وجُود
وإحسانى إليك باقِى
فِـ أولادى يكون مَردود
***
دَ انا زَرعة زرعتيها
ومِن دَمِّك سَقِيتيها
ويامَا سِهِرتِ يا طاهرَة
ليالى طُوال تِراعِيها
***
زَرَعتِ الوَرد والصبَّار
وقُلتى ياشاطِر الشُّطَّار
حرام لو ماتوا مِن بعدِى
راعِيهُم ، كمِّل المِشوار
***
فسامحينى يا أغلى النَّاس
لأن الزَّرع هان وانداس
و عَزّ عليه فُراقِك لِيه
فعاش بَعدِك يتيم مِحتاس
***
فِـ عِز البَرد سَهرانَة
وحيرانَة وقلقانَة
تِغطِّينى و مش بَردان
وهِيَّا يا عِينى بَردانَة
***
ولو جَه يوم وكنتْ عليل
عِنيك مَاتنَمشِ طول الليل
يبات دَمعِك عَلى الخَدِّين
يشيل عَنِّى آلامِى شِيل
***
وكَفِّك للسَّما مَمدود
فِـ كُل ركوع وكُل سجُود
بيطلب لى الشِّفا والعُمر
بأمر الواحِد المَعبود
***
تِحُوشي لُقمَة بِتعِينِك
عَشان اشبع قُصاد عِنيك
بإيدك تِطعِمِيهالى
وتحضُنِّى دِراعِينك
***
عليك رَحمَة مِن الرحمن
تِزفِّك للجِنان بأمان
وتجمعنى معاك على خِير
على حوض النَّبى العَدنان
