قَـهـوَة سـادَة
حمادة البهلوان
ياللا نشرب قَهوَة سادَة
والعَزا تحت المَظلَّة
فى اللى ماتوا بالبيادة
واللى ماتوا هَوان وذِلَّة
...........................
دُول وكانوا بيحموا دَولَة
مِن مُواطِن حاكمُه جِيش
المواطن فيها أولَى
بَس مش عارِف يعيش
...........................
ودُولا َ هُمَّا مُواطنِين
هَمُّهُم مَركِب شَبكهُم
طول حياتهُم مَشغولين
بالسَّمك يدخُل شِباكهُم
...........................
أَرزُقِيَّة ، يوم بيومُه
خِبرَة مَغزولَة بكَيَاسَة
كُل واحِد لُه هُمُومُه
البعيدَة عَنِ السِّياسَة
...........................
صيادين آخر طَيَابة
طافحنين مِيت ألف كُوتَة
رَغَّايين لكِن غَلابَة
كُل سَرحَة بألف مُوتَة
...........................
بحرُهم مَليان كَوَارِث
رِزقُهم عاوز مُغامرَة
مَجبُروين ، والمَولَى حارِس
لُقمِة العيش اللى مُرَّة
...........................
والأمَرّ مِنها لمَّا
يوصِفوهُم إرهابيَة
يترَموا فى السِّجن لَمَّة
والحقيقَة مِتدَّاريَّة
...........................
والضَّحية : المواطِن
اللى مالهوش فى الأذيَّة
دَه عَشان كان مُخُّه رَاكِن
مَنتَبَهشِى، بحُسن نِيَّة
...........................
ذَنبُه إيه ( عِزَّت ) وغِيرُه
ينظَلَم بالشَّكل دَا
الكلابش يكون مَصيرُه
ويجعلُوه كَبش الفِدا
...........................
العَزابوَة مش أرانِب
العزابوَة رجُولَة وَاعيَة
ولِينا رَب و أمرُه غالِب
ضَربتُه للظُّلم قاضيَة
...........................
( عِزبة البُرج ) اللى ياما
قاومت الأعداء بِقوَّة
فى التاريخ صَبحِت عَلامَة
للشَّهامَة والمِروَّة
...........................
واللى قالوا إرهابيَّة
كَدَّابين ، والكَدب واضِح
دُول شويِّة بَلطَجيَّة
جَمَّعِتهُم المَصَالِح
...........................
دُول شويِّة بَلطَجيَّة
جَمَّعِتهُم المَصَالِح
