" صَبرٌ جَميلْ "
الليلْ طويلْ
لكِن أكيد
هَيكُونلُه آخِر، صَدَّقِى
والبَحر عالى
يا طَيِّبَة
لكِن لامُمكِن تِغرَقِى
دَانتِى الكِنانَة أُم الرَّجال
وللصَّدارَة والأمَان
راح تِسبقِى
الظُّلم فارِد مِيت شِراع
فِى البَحر دَه
والمُوج عَفِى
بيفَتِّت الصَّخر اللى عُمرُه سنين
علَى قِيد الحَياة
بيواجِه الرِّيح العَقِيم
لكِن بكِلمة رَبِّنا
بين كاف ونون
بيكُون رَميم
والعَتمَة ساحبَة كتير مَعاها بدون أمَل
رَاضعِين طَلاسِم كِدبُهُم
علَى نَفسُهم
ان الحَياة هتدُّوم لُهُم
مِن غير أجَل
ولا حِساب
ولا عِقاب
يكون لُهم مَنُّه الحَذَر
مع انُّهُم حَبِّة نَوَر
شِلَّة لصُوص
علَى سَفَّاحين
مَابيرحَمُوش
خَفافيش وحوش
بِتمُص دَم الشَّقيانِين
قُوت الغلابَة المَطحُونين
طَب يرضى مِين
وازَّاى يبُصُّوا للرِّغيف
اللى فـ إيدين المحرومين
وازَّاى بيرخَص عَندُهم دَم الوِلاد
أطهر ماجابت بَطن طاهرَة فى البلاد
الدَّم هان
والعِرض هان
والحَق شمس مِشقشَقة
لازِم تِبان
بَس بأوان
شايلُه القَدَر
مش قُلتِلِك حَبِّة نَوَر
العنكبوت ناسِج علَى وِشّ القَمَر
قُضبَان وغِيم
قُضبَان بِتسجِن أبرِيا
أحرار فصيلة دَمُّهم :مَصرِى حَسيس
عَلَشان أُسُود
كان نِفسُهم الحَق تِسبَق خَطوِتُه باطِل خَسيس
والعَدل تِرجَع سَطوِتُه وبينهم يسُود
لو حتَّى يفضَل مِنُّهُم
وَاحِد يعيش
فَمَتِيأسِيش
صَبرٌ جَميلْ
الليلْ طويلْ
لكِن أكيد
هَيكُونلُه آخِر، صَدَّقِى
والبَحر عالى
يا طَيِّبَة
لكِن لامُمكِن تِغرَقِى
دَانتِى الكِنانَة أُم الرَّجال
وللصَّدارَة والأمَان
راح تِسبقِى
