النحل لما يشم دم
حمدى موسى
ولا شفت منك أى يوم أبيض ولا اسود
ولا حتى ود
ولا جيتى يوم قولتيلى خد
وصيتى من يوم السبوع
أسمع كلامك واستعد
وللاسف كان كل همك زى عادة كل أم
إنى ابقى مقطوع النفس ومقولشى بم
وكأن انا ملك ليمينك إنتى بس
ومكانشى مطلوب انى احس
كان كله شيل
ولا مرة واحدة قولتلك حملك تقيل
كان كله روح
ولا مرة واحدة قولتلك مليان جروح
كان الهدف مارفعشى عين مارفعشى صوت
حتى دعائى لربنا كان له شروط
مربوط ببرك والسكوت
كان حتى ممنوع الأمل والأمنيات
كان حتى ممنوع العياط
كان كله هات
طول عمرى طفل غريب مهوش من حقه حضن
وبرغم سمعى للكلام مقروص فى ودن
ماليش نفس وكأنى عقرب للساعات
تحسى بيه لما تلاقى الوقت فات
كان كله هات
إديتك الوردة فى أول عطرها
كان نفسى بس اشمها
كان نفسى أرسم زيها
كان نفسى أتمرجح واطير
واعمل شقاوة واكسر اللى بينكسر
ومخافشى من اخويا الغبى
ومخافشى من اخويا الكبير
والعب مع القطه وانونو زيها تحت السرير
كان نفسى انام مرة ف هدوووووء
كان نفسى ادوق طعم الندى طعم الشروق
فا طلعت خايف م الولاد ومن البنات
كان كله هات
إديتك الضحكة اللى مفرحتش بها
ووهبتهالك كلها
ودفنت راسى بين قناطير الورق
هطلع طبيب او يوم ما خيب
اطلع مهندس ولا ظابط
رغم قولك من زمان
كل شئ قسمة ونصيب
مين اللى حاصل ع الشهادة مش أنا ؟
خدتيها ليه بتعلقيها ع الحيطان
تتعايقى بيها لما يجى حد زاير م الجيران
الواد فلح الواد نجح الواد بقا اسم الله عليه
قاعد على ناصية شارعنا بالنهار بيبيع سبح
انا تحت امرك اطلبى واقلبى كل المصانع فاترينات
كان كله هات
إديتك القوة وكل الفيتامينات
وكنتى لما بتسخنى اعمل دموعى كمادات
ووقفت على شطك ألاغى الموت واعاكس دبابات
واغمز بعيني تقع في حجري طيارات
وعملت فيكى معجزات
مبسوطه خالص حضرتك لايق على شكلى الممات ؟
كان كله هات
عاوزه تانى ؟ عاوزه ايه ؟
لسه عاوزه من حنان الواد مدد
لسه عاوزه حب تانى وقلبى عايش نكرة
وكمالة عدد
قررت اتوب عن حبك العاصى النجس
فى قصيدة سابقة قولتلك انا بكرهك
وختمتها ولعنت قلبى عشان صبح مبقاش يحس
ورجعت فى كل الكلام
حتى ساعتها قولت لك انا بعتذر
لكنى كنت مع الحذر مستنى رد
لكن النهاردة كل كلمة قولتها كانت بجد
ومعادشى حيلتى اى حاجه غير الكسل
النحل بطل بعد ما شم الدماء ينتج عسل
فامتطلبيش علشان مفيش غير الاهات
متفكريش ولامرة واحده تقولى هات
وكمان عشان تطمنى
انا مش هخلفلك ولد علشان يموت على دين ابوه
وفى النهاية يلعنوه
انا مش هسيبلك أى ذكرى غير قصيدة
من ديوان الندابات
فيها البطل ماتت حبيبته من الندم
إكمنه مات
