لــــيــل و فـَــجــر
ياليل الظُّلم يا مرَوَّح
بتِطوَّح فِـ ضِل نهار
طالِعلَك فَجر مِتسَوَّح
على مُوجة أمَل بِنهار
تكُون الشمس لُه مِينا
وتِفرِد ضَيَّها تانى
وتِتجَدِّد أمانينا
ولا نِتهان ولا نعانِى
يافَجر العَدل يا قُرَيِّب
بَشايرَك هَلَّة واللهِ
ونُورَك مَبسَمُه طَيِّب
جَميل أبيض بلون زاهى
فِـ عِز الضَّلمَة بيصَبَّح
كأنُّه فـ غُرفِة الانعاش
بيندَه عَـ الشَّهيد يفرَح
عشان دَمُّه مَرَحش بلاش
وعَـ الأحرار فِـ كُل مَكان
وَرا القُضبَان وفِى المَيادِين
و ُكُل عزيز رَفَض يتهان
رَمُوه بالظُّلم فى الزنازين
شويِّة صَبر وَيَّا ثَبات
و بُكرة الحق هَيلالِى
و نعبُر كُلِّنا الأزَمات
مَدام صوتنا قَوِى عالى
دَ صوت الحق مهما يغِيب
صَداه راجِع فـ أولادنا
بحَبِّة تَوعيَة وتَرغِيب
وحُب حقيقى لِبَلَدنا
ومش شايفك يا بُكرة بِعيد
هَتيجى فـ يوم بإذن اللهْ
وهَالبِسلَك هُدُوم العِيد
وهَتفَائل بأحلَى حَيَاة
وقبل الليل مَيتَّاخِر
و يرحَل عَنِّنَا بِفُراق
فِـ نَفسى كلام مَِنِ الآخِر
هاقُولُه ورِزقى عَـ الخلاق
سلام من قلبى للثَّوار
لكل جرئ قََهر خُوفُه
حَلَف لَيكمِّل المِشوار
برَغم القِيد وتَكتِيفُه
ساعتها المستخبى يبان
ومين ظالم ومين مظلوم
يا ليل السجن والسجان
زمانك راح ، وجايلك يوم
هَتِترَدّ المظَالِم فِيه
و وَرد الحَق هَيفَتَّح
بريحِة فَجر هَلّ علِيه
و ليل الظُّلم هَيرَوَّح
ياليل الظُّلم يا مرَوَّح
بتِطوَّح فِـ ضِل نهار
طالِعلَك فَجر مِتسَوَّح
على مُوجة أمَل بِنهار
